1Cor 12 | BEF | STEP | Nalalu'nigita, Sikalafu'uba amuya fato fato'mofihi limilata nohina hapa'a keheli sibi hise kumu lu lepilugi kehelilo.

1 Corinthians 12

Sikalafu'uba mono kamofihi amuya'a limilata nohibe

1 Nalalu'nigita, Sikalafu'uba amuya fato fato'mofihi limilata nohina hapa'a keheli sibi hise kumu lu lepilugi kehelilo. 2 Lenali koyapa'i mono ka mekehelise bona'i nehago lenegekesa fi hekini lago negi nete nasana luga'amofihi faga faga lugefagu bite i hepilata hi'ahanamo yamofihi keheli'ahanamo ni'inagihe. 3 Yanamofihi megesa'aga linogo'ni kehelilagi keheli'ehilo. Bo mone'mofihi Hu'mamofihi Sikalafu'uba le'mo babahi higo Yesuhi le'mo gumi'i molo emito melilube'mu hibe. To Sikalafu'uba babahi mehinogo Yesu ya'ma Sipi Bo'ni nohibe luto melilina'mu yabe.

4 To mono kamofihi amuya'a fato fato'mofihi ni'inaya Sikalafu'i moneko'uba ana amuya'a limilata nohibe. 5 Mono kamofihi foya'a fato fato suhi huto ni'inaya foyamofihi afo'afu Sipi Bo ai moneko'i nohibe. 6 To mono'mofihi amuya fato fato'mofihi foya'a lilata nohutaya Hu'mau moneko'uba lehe'mago lilata nohune. 7 Sikalafu'i yauba monolugu bati hite minalabe luto mono'mofihi amuya'a silaga'i guna moloto limi su holata nohibe. 8 Mone'mofihi ya'ma Sikalafu'uba le'mo babahi higo mono ka keheliya ito lulata nohibe. Moneuba ana huto Sikalafu'ubago le'mo babahi higo fato fato hapa'a lu bati huto lulata nohibe. 9 To bo moneuba ai ana Sikalafu'moubago le'mo babahi higo Hu'ma kumu keheli ule'ale hinalo amuya nasana huto hulata nohibe. Moneuba ana Sikalafu'uba le'mo babahi higo epesi'ehilina bona'i enele'mo ye kolata nohibe. 10 To moneuba topa hose nasanamofihi foya lilibe luto amuya nohibe. Moneuba Hu'mamofihi bagaguti ka'a lilibe luto komopa'a ekesa li hokolo hu etolata nohibe. Moneuba ya'ma ana'ina silaga'i Hu'mamofihi Sikalafu'mofitoga ni'ina meni'ina nasanamofihi hapa'a bu go bebe salibe luto komopa'a ekesa li hokolo hu etolota nohibe. To moneuba fato ka bona'magihi enonogo'aniguti mono ka sibigopa lilibe luto baga le'mo babahi hulata nohibe. Moneuba enali enonogoguti lu hokolo huto lu epilibe luto baga le'mo babahi hulata nohibe. 11 Ya nasanamofihi amuya silaga'i Sikalafu'i moneko'uba ai'a ekesa kehelito le'mo eto eto huto guna moloto limi su holata nohinamo ni'ibe.

Lugufa'a moneko nehepinogo kele kele nasana moneko'i minalibe

12 Bona'magita lali Kilisitohi lugufa moneko'na tegi huto nohune. To lugufamofihi kele kele nehi etana nasana ligi layahati lokaba labaga lubu legekesa yamofihi babu luto ni'ibe. Enali ya'ma nekisa'a li nupa hago lugufa moneko lolo huto ni'ibe. Kilisitohi gufa'a ana suhi huto ni'ibe. 13 Sikalafu'i moneko'uba lalitoga limiloto mono kagu lele'mo nupa higo lugufamofihi suhi huto moneko'i lolo huto nohune. Sikalafu'i moneko'uba lali'i asaga'i mono'i folo leto'ehina lugufamofihi suhi huto moneko lolo huto minalune luto lele'mo nupa hu'ehibe. Ya higo lali Yuta bona'i to Giliki bona'i, kele kele bona'i to fa'mene nohuta bona'i lali moneko Hu'mamofihi Sikalafu'i lito komopatigu molo su holoto moneko'i lolo nohune.

14 Lugufamofihi kele kele'na ya'ma moneko'i meni'ibe. Babu lite nehabe. 15 Yamofihi ligigusauba ma luto melilube'mu hibe: Nani yaha'a menohube. Ya hu'ehina'mu gufamofihi nekisa'a menohube luto luloto lugufa he'miloto ai'asigo meminalube'mu hibe. 16 To legekesauba ma luto melilina'mu yabe: Nani bu'a menohunago ya'ma gufamofihi nekisa'a menohube luloto lugufa he'miloto ai'asigo meminalube'mu hibe. 17 Lugufalo ya'ma lubugo minatita lugufa'auba hena huto ekesa kehelitine? To lugufago ya'ma legekesago minatita lugufa'auba hena huto tu bitine? 18 Yamofihi ya huto meni'ibe. Hu'mau ya'ma ai'a ekesa keheli fe luto lugufamofihi kele kele'a asaga'i ya'ma foyaga fato fato'mofihi enele'mo tulu hu'ehina. 19 Lugufamofihi nekisa'a moneko'i minatita lugufa ya'ma sibina huto fa'menena lolo hitine. 20 Yatai ya'ma kele kele nasana babu luto nehago lugufa moneko'i ni'ibe.

21 Ya hu'ehina'mu lubu'uba layapofihi ma luto lu meemilube'mu hibe: Kai lali lufusati menohatagi he'miloto bubo. To latahatiuba ligigusamofihi ya luto melu etalina'mu yabe: Kai lali lufusati menohatagi he'mito bubo. 22 Ya huto meni'ibe. Lugufamofihi nekisa'a luga'a amuya nasana ya'ma meminatita lali mino bati huto meminotita'mu yabe. 23 To lugufamofihi nekisa'a mone kumu kehelutogo limite nehana'a yamagihi kaba hu epololata nohune. To lugufamofihi buya'a hulata nohina nasana yamofihi guketetu ifi toto sekele mamu hulata nohutaya. 24 Lubuya mehuse nasana ya'ma huto'i minelata nehabe. Hu'mau ya'ma lugufa li huto hu'ehina lugufa nekisa'a limite nehana'a enali'i kaba hu bati hu'ehina. 25 Lugufamofihi nekisa'a enali fato fato hite meminese legege hite ai kele kele'i hu etenogo ai kele kele'i hu etenogo hite minalabe luto foya epi'ehina. 26 Ya hu'ehina'mu lugufa nekisa'a mone'mofihi kota'i helenogo keke'i lilinamofihi luga'amagi enali hiti keke'i lu baga ilana'mu yabe. To lugufa nekisa'a mone'auba bati huto minenogomo luga'a silaga'magi enegelo bi su hete enegelo bilana'mu yabe.

27 Ma suhi huto ni'ibe. Lenali asaga'i li nupa hite Kilisitohi gufa'a legi huto moneko'na lolo hite kele kele'i hi etete nehabe. 28 Lali Kilisitohi naga'a lolo nohuta bona'magita ma huto nohune. Hu'mamofihi naga'a lalitoga ana huto enele'mo eto higo nehabe. Yata'a luga'a aposolo lele'mo eto hulago lali foya ti'ehibe. Yaloti limito Hu'mamofihi ka'a lu yege hose bomofihi bagaguti kaga lu huto hulata bo. Analoti limito Hu'mamofihi ka hapa'a enelepise bo amuya suhi fato fato'mofihi li'ahana bo, enele'mo eto hu'ehina. Analoti limito topa hose nasanamofihi lolo hu'ehina bo to amuya'aloti epesina bona'i enele'mo ye kose bo hiti to enehe'malata bo to foya kaba bo to fato fato enonogoguti fa'mene kaga lu huto hilata bo, enele'mo eto hu'ehina. 29 Lali asaga'i aposolosigo lele'mo eto hu'ehina ni'ifihe? To lali asaga'i ka'a yege hose bagaguti kaya lu huto huto bonago hiti lele'mo eto hu'ehina ni'ifihe? To lali asaga'i mono ka hapa'a enelepise bonago lele'mo eto hu'ehina ni'ifihe? To fato fato topa hose nasanamofihi suhi li huto hilata bonago lele'mo hu'ehina ni'ifihe? O'e, o'e, ya huto meni'ibe. 30 To epesina bona'i enele'mo ye kelata bonago lele'mo eto hu'ehina ni'ifihe? To fato fato enonogoguti fa'mene lu huto hilata bonago lele'mo eto hu'ehina ni'ifihe? To enali enonogoguti lu hokolo hite lu neepina bonago lele'mo eto hu'ehina ni'ifihe? O'e, o'e, ya huto meni'ibe. 31 Ya'mu lenali mono kamofihi amuya'a tito nina'a lilune lite amuya malalo.

To nani amuya nasanamofihi kapo lamana'a enebe ligilanamofihi ka'a lenelepilugi kehelilo.